|
我們的無聊節錄
............................................................................
飯後和胡生行「屈錢紙」，我們在店舖內是分頭行，突然胡生崩崩跳的走過來，說了一段他和 sale 屎姐姐的對話∼
Sale 屎：「先生！你搵咩呀！我幫你丫！」
胡生 ：「我搵老婆！」
................................................................................. 2003.01.02
飯後胡生已嚷著要落街放直昇機，還力邀阿雲一起前往，但因為煮飯後要洗碗洗廚房並沒有應邀，落街不到十五分鐘的大細路，拿著直昇機殘骸回家第一句∼
胡生：「部機頭先係空中解體呀！」
阿雲：「點解既？」
胡生：「唔知呀！都仲未搵到飛行黑盒！」（何來黑盒？）
阿雲：「．．．．．」
................................................................................. 2003.01.09
昨晚臨睡覺前，又做了一件「踩屎」行為∼
阿雲：「你聽日好去剪髮啦！得閒就染埋佢！好多白頭髮呀你！」
胡生：「係咩？咁你快ｄ幫我"盟"左佢啦！」
阿雲：「唔好啦！你染髮啦！」^^|||
胡生：「快ｄ啦！唔該丫！」
阿雲： 一_一（踩屎）
................................................................................. 2003.01.20
胡生：「白電油果然神聖！乜都洗到！」（他是傳聞中的藍威寶皇帝嗎？）
阿雲：「你試下要黎洗臉丫嘛！」
胡生：「"拿"架！」
阿雲：「……」（原來佢真係有諗過！）
................................................................................. 2003.02.06
阿雲：「你估舊攝石會唔會用用下唔攝丫嗱？」
胡生：「會架！所以你唔見我成日唔刪櫃桶咩？」
（他只是懶，但我又好踩屎地比佢多左個藉口！蠢！）
................................................................................. 2003.02.10
胡生：「弊啦！弊啦！我張書檯底下有個黑洞呀！」
阿雲：「咩事呀？」
胡生：「我頭先又跌左野落地搵唔番啦！」
阿雲：「如果地下有個黑洞，麻煩第一時間吸左你先啦！」（繼續煮飯）
一踏入家門，胡生就嚷呀∼嚷呀∼嚷到家下（？！），近來他常在書檯上砌模型，每次跌了零件落地都找不到，我已見怪不怪，但今次竟然不肯罷休，還不時爬在地上四處找，終於在我打日記時在他的椅子旁找到，噓∼一額汗，否則還有排煩！
................................................................................. 2003.02.11
剛剛問胡生陌生人的「陌」字是如何寫，換來的答案真激死∼
阿雲：「陌生人個陌字點寫呀？」
胡生：「黑字下面加個土囉！」
阿雲：「唔係呢個呀！」
胡生：「咁呀！上面加草花頭囉！」（邊有呢個字架！）
阿雲：「唔係呀！隨口up！好似個白字咁架！」
阿雲：「呀！我記得！」（之後開始寫）
胡生：「咪係囉！咪係囉！」（死唔認衰到自己都忍唔住笑）
胡生：「但係你頭先話墨西哥個墨丫嘛！」（唔認衰工夫好強呀下）
................................................................................. 2003.02.14
胡生：「我ｄ手指又甩皮啦！要食ｄ魚呀！」
阿雲：「係咩？咁星期日我煮魚囉！」（雖然我唔明佢咩理論）
胡生：「唔使啦！我今日食左！」
阿雲：「係咩？去邊度食呀！」
胡生：「麥當勞囉！我今日去食左魚柳飽呀！」
................................................................................. 2003.02.21
胡生：「哦？？！！（很驚訝的聲音），佢能醫不自醫喎！」
（手上拿著一支爛了蓋的萬能膠水）
阿雲：一_一|||
總括來說這個不是對話，只是有人說但沒有人答，因為這支萬能膠陪他走過很多個直昇機工程，每次直昇機被撞得體無完膚時，都多得這支萬能膠替它續命，雖然我知這支膠對他有特別感情，但∼∼他的腦袋究竟裝什麼的呢？我家的大細路真是∼∼奇怪！！
................................................................................. 2003.03.15
有人應承放工後即刻回家吃飯，為了老公仔一回家可以有飯吃就急急腳買菜勁走回家，當飯煮好一半時問有人在那裡，那個有人因為之前去了「哨街」竟說現在才等巴士，氣得我半死，那個有人知死了，激怒了皇太后，回家第一句就是「唔好嬲啦！」，不說由自可，說後被炮轟在所難免。
「你知唔知我頻頻撲撲放工買送好累架？」「知！」
「你知唔知你遲一個鐘番我就遲一個鐘頭休息架？」「知！」
「我一日番工八個鐘加埋煮飯就做足十個鐘呀？」「對唔住！」
「我咁趕煮飯煮比邊個食呀？」「條茂利！」
「唔好鬧住啦！食飯時比你繼續鬧勒！依家幫你開飯先！」（笑）
................................................................................. 2003.03.17
胡生：「有無衫著呀？」（在我打日記時，有人赤裸上身冷到謄謄震地督著我背脊問）
阿雲：「著唔著底衫呀？」（已起身行動）
胡生：「著！」（很期待這個問題的人和我搶著答）
這間屋不足七百呎，兩房兩廳，兩個人住，也不算很大的一個家，為何我的胡生就是這麼懶呢？他要行入來書房問我要衫著不如行入睡房還要近些。
................................................................................. 2003.03.19
胡生：「我一陣間一定要痾屎呀！」
阿雲：「咁凝重呀？！」
胡生：「無！我頭先買左本書之嘛！」
這本原來是說明書，果然大件事！要痾屎，要痾屎，唔痾點睇得明呀！吹脹！！！
................................................................................. 2003.03.21
胡生：「我估一陣我收埋ｄ餐肉o係個口罩度返公司慢慢食都無人知呀！」
阿雲： m(_ _)m （被打敗）
胡生所用的口罩是３ｍ產品，所以咀部前的圓形位置比較多，亦令胡生產生「霞想」的機會比較多，餐肉事件後，再有人將口罩放在頭頂扮公雞，但這個白癡行為惹來被鬧兼必須將口罩棄掉，原因是頭髮細菌很多，弄髒了就不可放回口中，白癡胡生又在浪費金錢，激死！
................................................................................. 2003.03.30
阿雲：「你今日點！點！點！之後又點！點！點呀？」（胡生回到家開始就不斷講野）
胡生：「．．．」（沒有回答，努力地爬飯及陪笑）
阿雲：「你唔使理我架，我成日無講過野啦，你返到黎聞唔聞到我口臭丫？」
胡生：「．．．」（繼續陪笑）
阿雲：「你真係唔使理我架，我呀∼我今日不知幾悶不知幾掛住你呀！」
胡生：「．．．」（聽到呢度終於忍唔住大聲笑！果然，講都無人信！）
................................................................................. 2003.04.03
胡生：「呀！救命呀！」（一手持著甜筒，一手持著甜筒招紙的人叫道）
阿雲：「咩事？」
胡生：「個垃圾桶無垃圾袋呀！我又無手！」
對著這個老公，叫救命的應該是我嗎？！
................................................................................. 2003.04.06
胡生陪我去看五月天 WDO，他的職責就是攝影師，開 show
後不久他便站到一班女大學生旁邊的有利位置替我拍照拍視頻，能夠站到好地方事前當然有混熟一下嚕！
女生：「你鍾意左五月天幾耐呀？！」
胡生：「嗯？！一個鐘頭到啦！」
女生們笑了，絕對無言啦！後來他才告訴他們是替老婆拍照的。
這是他後來告訴我的，笑死我！他從來沒有喜歡過五月天好不好？！
................................................................................. 2003.04.08
近來吃飯時都會少不免談到「非典型肺炎」今天的死傷人數
胡生：「等我今晚番去再睇下新聞台既最新情況先！」
阿雲：「哈∼我發覺我越黎越崇拜你呀，好有新聞觸角呀！」（當然是吹水啦）
胡生：「哼！使乜講！」
阿雲：「我以為你淨係識睇體育台添．．．」
胡生：「咳咳咳．．」（被嚇親而嗆到！）
阿雲：「你做咩咁激動呀？」
胡生：「無！我幾驚你話我只係識睇CATS 83, 84台！（成人台）」
哈哈∼身有「屎」的人特別麻煩！
................................................................................. 2003.04.15
阿雲：「丫！你估你第時會唔會識過第二個女人丫拿？」
胡生：「無啦啦點識呀？」
阿雲：「咩叫估o者！可能係日久生情呢？」
胡生：「無啦啦去邊度『搵日』同『搵隻狗』生情呀？」
................................................................................. 2003.04.17
胡生：「如果你搵唔到野做，不如攪下生意丫？」
阿雲：「攪咩呀？」
胡生：「幫人抄翻版Game丫！實有得做！」
阿雲：「老公呀（這個稱呼很少叫的，通常在串他時才會用的）！其實你想娶過個出聲得架啦！唔使一定要睇住我比人拉架！坐監好慘架！」
胡生：〔笑〕（唔笑可以答咩呢？）
什麼老公？！整天叫自己老婆做犯法事！
................................................................................. 2003.04.30
覺得胡生腦中常常都想做些犯法勾當，再這樣下去，遲早不是他被警察拉了就是連累我坐監
阿雲：「你第時老左咪好似果個阿伯咁開間舖頭仔看檔囉！」
胡生：「唔好，咁辛苦，我想第時既舖頭係唔使看檔既，好似頭先果個翻版佬咁，只係企o係遠處睇，間唔中行埋去睇下個錢兜然後收埋ｄ錢！得閒又可以周圍同人傾偈！」
（註：因為買翻版時是要自己將錢放入錢兜中，沒有交收行為的）
胡生：「所以賣翻版應該係又搵到錢又唔辛苦既！」
阿雲：「咁……做乞兒丫！同你講既都一樣！又係得閒o係個兜度拎錢，又可以成日同『行家』傾偈！」
想死！我究竟嫁了一個什麼老公？
................................................................................. 2003.05.11
阿雲：「出去飲水！」（軍官口吻）
胡生：「你ｄ口吻成日好似命令人咁！」
∼∼∼∼飲水回書房時拿著一支食物存氣夾∼∼∼∼
胡生：「你唔係劉凱Ｘ！你唔係劉凱Ｘ！快ｄ出黎唔好攪我老婆，佢平時唔係咁惡既！」
（將存氣夾夾在我中指地叫道）
胡生可真是癡癡地！
................................................................................. 2003.05.28
在廚房摷零食中的胡生，突然衝進來書房，帶些少質問語氣
胡生：「呢支咩黎架？無知師奶！你又o係邊度比人呃錢買埋呢ｄ野呀？」
阿雲：「咩呀？有用架！」（誠意地教胡生用，完全忘記被人叫「無知師奶」）
∼∼∼∼一會∼∼∼∼
阿雲：「你頭先講咩『無知師奶』呀？」
胡生：「哈∼咁遲先有反應，醒極有限啦！」（繼續笑）
好！算！這次好像真的失策了點，所以不反駁，但∼決不會有．下．次！！！
................................................................................. 2003.06.01
胡生：「我揀左麥精飲，你知唔知點解呀？」
阿雲：「係呢，點解呢呵？」（沒好氣）
胡生：「無∼我見到雪櫃有五包麥精，四包維他奶，咁我揀左麥精，佢地咪一樣係四包囉！」
這個答案恐怕我一世也不會想到，我說真的！他的腦袋可能真是有問題！一_一|||
................................................................................. 2003.07.19
胡生：「你用呢個方法丫嘛！」
阿雲：「我夠知啦，你做乜抄我呀？我岩岩都係咁諗！」
胡生：「我點知你諗咩呀？我都係岩岩諗到！」
阿雲：「哈∼我地個腦真係接近，大家一齊諗到喎！」
胡生：「係咩？我唔係用個腦諗架喎，我頭先用個Ｃ忽諗架喎！」
胡生正賤人！
................................................................................. 2003.08.04
拿著蕃茄借給我的心理書在車上和胡生玩，結論後的結論是
阿雲：「你係一個唔鍾意收藏野既人！
胡生：「係呀，好耐之前收藏左你一個就……就夠煩啦！」
.................................................................................
2003.10.05
胡生是日金句「我個人呢，口就會話『老婆係奴隸』，但心裡就『係老婆奴隸』！」
有人信嘛？！佢唔笑果下高丫嘛！
.................................................................................
2003.10.05
午餐後邊行邊在胡生耳邊唱著「志明與春嬌」（註：台語歌，正常香港人應該聽不懂的），碰巧在我們前面有一位賓賓姐姐，她亦是邊行邊唱著賓賓歌∼
胡生：「喂喂∼你快ｄ行快兩步啦，你地唱既歌都係無人聽得明既，可以合唱呀！」
這個世界應該沒有一個做人老公的夠他賤格。
.................................................................................
2004.02.07
轉述一件事給胡生聽讓他替我解決，轉述途中我講到「一舊舊」
胡生：「我要出去跑十個圈呀！」非常平靜又有禮貌的道
阿雲：「點解呀？」
胡生：「炆囉！」
哇哈∼聽完他這樣說笑了我十分鐘，話說，我曾經告訴他，他解答別人問題時給人的感覺很沒禮貌，所以他今次便想用運動作發洩來減輕給人粗聲粗氣的感覺，好白癡。
.................................................................................
2004.02.21
打赤膊的胡生出門倒垃圾
胡生：「我出街啦！」
阿雲：「哦∼唔好咁夜番呀！」
∼回來∼
胡生：「我頭先無著衫，驚夜ｄ凍呀，所以咁早番黎囉！」
神經病
.................................................................................
2004.03.12
我家用的是新裝的 Walch 泡泡洗手液，胡生的問題
胡：「呢隻泡泡有無第二隻味？」
雲：「唔知呀，我下次去睇下丫！你唔鍾意呢隻味呀？」
胡：「係呀！隻味好難聞，但係ｄ泡好好玩，所以你成日見我洗手！」
重申，他是三十幾歲不是三歲，但他喜歡玩泡泡！（汗．．．）
.................................................................................
2004.04.12
雲：「你咁講好不負責任呀下！」
胡：「我娶你已經好不負責任啦！」
雲：「你娶我點解不負責任呀？」
胡：「係我對自己不負責任呀！」
胡生正 CHEAP 精
.................................................................................
2004.05.10
胡：「我果時同呀邊個邊個都一齊過架！」
雲：「係咩？點解我唔知既？你無同我講過。」
胡：「係呀！你唔知佢都唔知，我都無同佢講過！」
這叫情史嗎？頂多叫暗戀吧！氣死我！還以為有大新聞我是不知情的！死白癡仔！
.................................................................................
2004.05.16
胡：「我話你知一個驚天地既消息丫，我今個月電話費千幾蚊呀！」
雲：「我又話你一個驚天地既消息丫，我今個月唔會幫你找電話費呀！」
胡：（轟隆）
雲：（哇哈哈）
.................................................................................
2004.10.20
胡：「ＢＢo係度做咩呀？！」
雲：「突然大力踢我一下，然後若無其事完全唔郁扮無事囉！」
胡：「咁佢都幾蠢架喎！你個肚有幾大o者！唔係佢做仲有邊個做？！」
雲：「係囉！間屋有幾大o者！你咪一樣成日做ｄ野比我鬧，我唔鬧你仲可以鬧邊個o者？！」
胡：「ｅ？！咁咪幾好，個仔好似我呀！乖仔！」
我承認，我們的對話真無聊。
.................................................................................
2004.12.15
胡生遲了上班，在我上班途中收到電話。
胡：「你老世番左黎未？」
雲：「番左！做咩呀？！」
胡：「我依家o係你公司對面個車站，諗住叫你企近窗，我同你揮手之嘛！」
雲：「咪傻啦！ｄ人以為你癲架！」
我公司在二十多樓以上啦！
.................................................................................
2005.01.12
雲：「我有一個問題想問左好耐架啦，Remote 點解呀？」
胡：「即係遙控囉！」
雲：「咁你成日張個ＤＶＤ遙控放o係部ＤＶＤ機上面，你覺得佢發揮到功能咩？！」
胡：「嘿！你有道理！」
然後把 Remote 拿回坐在沙發上的我
.................................................................................
2005.02.14
雲：「你有無嫌棄我肥呀？！」
胡：「有！！」
雲：「嗯∼果然好堅定呀下！」
胡：「係，因為我知答無你一定會話『真係？！』『唔會既？！』『無可能！』，所以不如一早答有早早了事！」
嗯∼胡生果然有道理，我真是這樣的。
.................................................................................
2005.08.18
胡生很多地方的 login name 都會用 tomatoXXXXX，今天他抱住阿仔時發神經∼
胡：「我係 tomato，佢係 potato（指住阿仔），我地係 tomato &
potato，Yeah∼」
（做著Ｖ字手勢）
雲：「咁我呢？」
胡：「我係 tomato，佢係 potato（指住阿仔），佢係 porkchop（指住我），我地係蕃茄薯仔豬肉湯，Yeah∼（做雙Ｖ字手勢）」
.................................................................................
2005.08.21
近幾天阿仔出牙齒咬得我很痛。
雲：「點解拍ＡＶ果Ｄ女人比人點打點咬點虐待都好似好享受咁既？唔係肉黎架？」
胡：「我無做過男優，無攪過日本妹，咁我點知呢？」
也對哦！
.................................................................................
2005.12.20
過兒找到龍兒那一幕原本很浪漫，過兒高興過度上天下水周街癲卻有點好笑，一直跑一直跑，胡生突然說
胡：「你癲夠未呀？！你好快ｄ同我番落黎啦下！如果果個係我你一定咁講！」
雲：「無錯，我正想問佢癲夠未！」
呵呵∼我知我們真的很無聊，但是知我者只有胡生也。
.................................................................................
2006.08.27
關於收集回收鋁罐一事，在廚房看見一個壓扁了的汽水罐，估計胡生一定沒有清洗過便放在那裡。
雲「胡生，你個罐有無洗過？」
胡「無！」不難猜
雲「仲有，呢度唔係卡啦ＯＫ，Ｄ罐唔使『渣』扁佢架，咁樣會唔好擺，好易跌。同埋記得洗，好易惹蟻！」
胡「但我去卡啦ＯＫ唔使做咁多野架喎！」
雲「呢度唔係卡啦ＯＫ，ＯＫ？！」
胡「我以為係！」
雲「咪傻啦！你見過卡啦ＯＫ有扎哂頭帶住厚眼鏡又老又殘既女咩？！」
胡「咁呢度係屋企啦！」
.................................................................................
2006.09.19
是日ＩＱ題
找零錢乘巴士，在銀包內找到以為夠數的零錢，看著零錢的數目總覺得不對勁，但卻想不到原因，過了一會再看看及認真地數一次，原來真的欠三元，銀包內只得一元，叫胡生給我兩元揍數，他給我兩元後我找回一元給他，他在疑問中收下（我顧著拿零錢而他要看著仔仔沒空理我），然後我又數數手中的零錢，為何仍然欠一元？！
雲「點解仲爭一蚊既？！」
然後我看見胡生臉上出現很受打擊的樣子說
胡「我頂你丫！你咁樣揍數揍一世都揍唔足啦！」
我還未知道發生什麼事，他再解釋後我才明白，到底當時我的心去了那裡呢？呵呵∼低Ｂ得可憐。ＸＤＤＤＤＤＤＤＤ
.................................................................................
2006.09.24
電視播肥田喜事預告片，對白：「ｄ人淨係睇到外面既高矮肥瘦，點解唔用對眼睇清楚內心既美善」，我正在餵阿仔吃藥，口痕地說了一句話然後差點笑死
雲「我老公對眼咪睇到囉！」
胡「唔係呀，我係插盲左咋！」
我笑到差點把阿仔的藥打翻，胡生果然風趣呀下！
.................................................................................
2006.10.17
胡「樓下架車咁嘈既？」
雲「係呀！收大件垃圾既垃圾車黎架，間唔中就有架啦！」
胡「咁你仲o係度既？」
雲「點解唔係度呀？」（完全不在狀態）
胡「收你丫嘛？！你咁大件垃圾！」
胡生的嘴會不會太殘呢？！
.................................................................................
2007.02.14
|